財源來蛤乸隨街跳

猪拉多纳

　　剛周日開鑼日熱門表現真係一啖砂糖……所以，唔好怪阿棟長氣，在此苦口婆心多講一次，買熱門，一定要三思，反之，冷門冇所謂，因為注碼有大細之分，有陣時要「轟」中熱門，唔係是但見到紅色買落去就中。

　　第二場五班1650米。「財源來」前季初45分贏馬、上季49分跑第二，現時減至34分，好大隻蛤乸隨街跳！今次重戴眼罩，阿石上季曾經用過呢招入Q，我認為配件變動係有出擊意思，加上，對準正宗路程，唔使擔心唔識應付。唯一考慮係薛寶力交唔交到貨，不過，實有賠率，博得過。

　　第三場四班1000米。「紅運福星」終在上季尾打開勝門，不過，贏完再出又冇，唔見得開竅後叻咗。其實今場唔係排1檔，未必睇得起佢，因為132磅可能孭得辛苦。當然，只要交出水準，數到對手，來來去去又係那批，唔會有太大威脅。

　　第五場四班1200米。「樂有贏」轉到阿文馬房，初出換呢樣、換嗰樣，唔跑過，好難預知結果。我只知呢匹馬落四班形勢一片大好，跑得出上季三班此程輸畀「好友星威」水準，呢批四班馬邊會係佢手腳，如有5倍以上，仍覺值博。(陳華棟 資深評馬人)