阿仙奴賣力報答捱貴飛球迷

猪拉多纳

「黑貓」新特蘭主場迎戰阿仙奴，由於兵工廠傷兵一大籮，阿迪達、華美倫、普多斯基、路斯基等肯定唔出得，剛轉投阿軍嘅英超標王奧斯爾極有機會隆重登場。

「大眼仔」對於畀皇馬無情逼走嬲到震，之後仲畀西班牙傳媒狂唱貪錢及性慾強，如今轉戰英倫一定踢爭氣波，勢必將一腔怒火發洩喺「黑貓」身上，況且中前場隊友禾確特與辛迪卡索拉極速上力，法國中鋒基奧特開咧三仗聯賽均有士哥，弗爆。據英國廣播公司最新調查，阿仙奴季票票價1,995鎊，單場票價126鎊，蟬聯全英最貴波飛冠軍，捱貴飛嘅「廠迷」對於「新阿仙奴」好有期待，球隊必賣力報答。

相反「黑貓」未嘗一勝之餘，中堅奧沙今仗要坐波監，悍將格力加特拿及巴士利亦受傷患困擾，防線隨時穿晒窿，奧斯爾配合成班弗到爆嘅「槍手」見縫插針，實拮到呢隻「黑貓」周身傷，一於捧客Ｗ賀「大眼仔」喺英超旗開得勝。