多蒙特大報復擦漢堡

猪拉多纳

德甲尾場多蒙特主場鬥漢堡，多蒙特係目前聯賽唯一長勝軍，面對上季雙殺佢哋嘅大仇人漢堡，當然會加多兩錢肉緊，漢堡踢法開放攻強守弱，今晚喺西法倫球場預期會係一場對攻好戲，入球大細中位數調整到3.5球照捧大盤。

多蒙特上季季初作客漢堡輸2比3，次循環主場仲衰到1比4被大炒，呢啖氣又點啃得落？雖然多蒙特今季主場兩戰都只能小勝，但要留意所遇嘅對手都採用龜縮戰術，但漢堡就唔識踢呢家波，場場同對手鬥攻，有利於多蒙特快速反擊，預計入球唔會少。

此外，多蒙特啱啱同中國電訊公司華為簽妥贊助合約，華為將喺西法倫建立可供超過4萬球迷同時上網嘅全德國最大球場無線網絡。
法蘭克福全日重心

除咗呢場大盤，黑柴全日重心落喺雲達不來梅主場對法蘭克福（周六晚9時30分開賽），主隊財困實力不斷下滑，今季改由杜特執教更變為死守球隊，喺轉會窗關閉前仲將技術型前鋒阿拿奧杜域廉價賣埋畀史篤城，今場仲有中場大將祖奴蘇域因傷缺陣，面對質高一皮兼狀態漸起嘅法蘭克福唔夠砌，平手盤黑柴強捧客軍。