歡笑多多轉場搏

猪拉多纳

　　今日10場草泥地賽事，睇落比起開鑼日混亂，個別場次好似群龍無首，唔爆就奇。另外，今日韋達及潘頓，夾埋手上揸咗好幾隻十幾廿蚊W嘅馬，熱到嘔冇得避，但係咪贏面壓一？真係未必。喜歡買熱門嘅睇定啲，必要時咪忍吓囉。

　　第一場四班1200米草地。「心理學家」呢匹「港女」演出係幾難靠，喺三班成日得個近字，踏入第二季已經6歲之齡，希望最終唔好變「剩女」。

　　好彩「心理學家」上季尾試到新跑法，四班此程後上入Q，呢次唔知會唔會同一騎法，假假哋一落班即首次上名，班次有利，薛寶力難得有匹好馬在手，一定搏盡。

　　第三場三班1200米草地。「歡笑多多」初出與「大寶藏」構成連贏，之後愈跑愈衰，唔知當中發生咩事，惟有視作唔適應水土，來到第二季，點都會成熟多少。

　　「歡笑多多」呢類質新有用子彈，李易達個倉為數有限，依家佢養馬又唔係多，更加會珍惜，應該會加以栽培，今次報名出得，唔會進度甩皮甩骨，轉場博人唔信，分多幾蚊，手法高章。

　　第八場三班1200米泥地。「如你所願」泥地跑4場贏兩場，兩次都係後上僅僅熟，但冇法子，鬼叫跑法被動冇得改。

　　如你所願形勢不差

　　今次「如你所願」置身呢場賽事，好多對手靠放食胡，早段扯得快的話，後追冇咁辛苦，如果臨場賠率唔係熱得太過分，4倍以上值得玩吓。

    (陳華棟 資深評馬人)