修咸頓主Ｗ扑錘

猪拉多纳

青訓學院堅 小兵個個醒

修咸頓盛產優質球星，被譽為英格蘭球壇「星工廠」，代表人物包括今夏以天價加盟皇馬嘅威爾斯球星加里夫巴利。「聖人」新季繼續重用自家製小兵，年僅十八嘅左閘勞基梳爾更成多支大會目標，有條件成為「新巴利」。修咸頓大軍活力十足，今輪主場迎擊缺少前利物浦三寶嘅「錘仔幫」韋斯咸贏面高，主勝捧得過！

（now 621周日晚11時直播）

修咸頓叫得做「星工廠」，梗係出產過唔少猛人啦，英格蘭傳奇射手舒利亞都係出自佢哋嘅青訓系統，當然唔少得英倫百年難得一見嘅天才中場拿鐵斯啦。近年修咸頓青訓學校畢業生都好猛料，除咗上面提過嘅加里夫巴利，仲有去咗阿仙奴嘅禾確特及阿歷士張伯倫等英格蘭國腳，連擅長搞青訓嘅阿仙奴教頭雲格都大讚「聖人」青訓學院好鬼堅。
勞基梳爾勁似巴利仔

「聖人」今夏使咗超過3,000萬鎊買入守將洛夫倫、中場雲耶馬及射手奧斯華度，但主帥普捷天奴並冇冷落班自家製小將，左閘勞基梳爾、右閘哥林張伯斯及中場禾特普斯全部十八歲、卜卜趣，勞基梳爾今夏先後同曼聯及車路士傳過緋聞，呢個左腳仔踢落有師兄加里夫巴利嘅影子，前景唔錯。大軍充滿活力，仲有今期人氣王英格蘭中鋒列基林拔，戰鬥力好勁。
韋斯咸缺前利物浦三寶

韋斯咸教頭艾拿戴斯今夏購入利物浦雙星安祖卡路爾及達寧，向來執慣爛銅爛鐵嘅大Sam肯使1,500萬鎊簽下卡路爾，全因上季試完覺得啱使，諗住搵佢做進攻重心，點知呢個大舊衰一傷再傷有排抖，搞到Sam哥方寸大亂。「錘仔幫」上場主場對史篤城一次中龍嘅射門都冇，今戰三個利物浦舊將祖高爾、達寧同卡路爾繼續休戰，睇怕都係會乖乖放低三分。
領隊Chit Chat

艾拿戴斯(韋斯咸)：所有上星期參加國際賽嘅球員都喺冇傷冇病嘅情況下順利歸隊，球隊依家非常專注今仗對修咸頓嘅賽事，我期望球員們可以喺今仗交出積極嘅表現。

普捷天奴(修咸頓)：韋斯咸喺過去3場證明係一支體力化球隊，佢哋踢嘅係簡單直接嘅足球。不過，我哋唔會因為咁而改變踢法，球員要依照既定嘅作戰計劃去應付對手。

猪拉多纳