及時入貨 英超爭霸添色彩

猪拉多纳

各支英超勁旅喺轉會窗最後階段趕得切入貨，令今季賽事增添色彩同衝擊，形成英超冠軍之爭，競爭者並非只係曼市雙雄及車路士。

先講吓曼聯，全能中場費蘭尼加盟「紅魔鬼」係佢同莫耶斯都雙贏嘅局面，雖然費蘭尼唔係大家心目中嘅貴價貨，但呢名遲熟嘅「爆炸頭」踢法多元化，更加係莫耶斯可以信賴嘅球員，對莫帥調兵遣將同建立自己勢力好重要。

車路士正正欠缺一名正前鋒，伊度奧喺呢方面絕對彌補咗球隊嘅「空缺」，Peter相信以莫連奴嘅功力，伊度奧可以再顯神通，回復番喺國際米蘭時嘅水平。阿仙奴有「大眼仔」奧斯爾加盟，有呢名德國當打進攻中場壓陣，比由二線中場路斯基及阿迪達發辦可靠得多，而曼城早已入貨，唔再多批評。
利物浦板櫈深令人期待

利物浦今季出閘表現特別好，再羅致馬馬度沙高及領隊羅渣士早喺16歲時已經認識佢嘅域陀摩西斯，比起以往幾季，後備力量的確增強咗好多。至於熱刺高價賣走一早已經無心戀戰嘅加里夫巴利，換來幾名有實力嘅新兵，一個換四個，實力並冇削減，亦令人期待。

自9月2日轉會窗關閉後，新兵今輪陸續亮相，邊個球員適應時間快同磨練到良好默契，邊個入啱貨、入錯貨，經過幾周賽事自有分曉。
金句：初來埗到望亮相 英超新兵盼出場