4連敗入得1粒 里昂讓唔起雷恩

猪拉多纳

今晚法甲尾場有里昂主場迎戰雷恩，曾經連續7屆奪聯賽冠軍嘅主隊一早風光不再，近日錄得4連敗嘅佢哋，就算面對雷恩都未必贏到波，一於捧1.95倍「讓客」撐客軍可以保住不敗。

（開賽時間：周一凌晨3:00）
哥古夫啞火

家陣呢隊里昂走緊下坡，係不爭嘅事實，但又有邊個會諗到佢哋今季開季2連勝之後又會連輸4場咁羞家先？最慘嘅係呢4場入面佢哋只係入到1球，同季初兩場入7球比起嚟只可以用走晒樣嚟形容，冇計啦，里昂今夏放走咗以往嘅入球泉源利辛度盧比斯之後，季初大勇嘅拿卡錫迪同哥古夫又突然啞火，加埋賣走中堅洛夫雲之後條防線已經走晒樣，今場對住實力唔差嘅雷恩，想全取3分的確有難度。
雷恩尼爾遜米基爾有料到

上季只係排13嘅雷恩，今季開局頗為理想，佢哋首4輪聯賽有3場不敗，其中由士砵亭借返嚟嘅葡萄牙前鋒尼爾遜米基爾，更係上陣3場就入足3粒，就算放咗另一射手艾丁畀聖伊天都影響唔到球隊火力，要同里昂踢成均勢甚至贏波，絕對唔難o架。