史雲斯受讓有得諗

猪拉多纳

盧特立出口術擾亂紅軍

「英超星期一」由史雲斯主場對利物浦，值得捱夜捧場。雖然紅軍主帥羅渣士同射手史杜列治呢期順風順水，分別獲選為英超8月最佳領隊同球員，但史雲斯教頭米高盧特立賽前出口術，質疑史杜列治點解咁快好番，出到心理戰擾敵，加埋佢哋嘅人腳唔差得過紅軍，主場出擊受讓平半，下盤有計！（now621台周二凌晨3:00直播）
史杜列治神奇傷愈被圍插

利物浦開季連續3場聯賽贏1:0，包括國際賽期前主場打爆曼聯，除咗為今場領軍倒戈嘅羅渣士爭番啖氣，史杜列治更加係風頭躉，計埋聯賽盃連續4場入波。不過咁，最近史杜列治以大腿受傷為由，拒絕為英格蘭國家隊披甲，搞到滿城風雨，講真，「三獅兵」上仗鬥烏克蘭關乎世盃出線生死，但史杜列治竟然闊佬懶理，難怪連昔日紅軍王牌奧雲都喺twitter湊熱鬧，暗寸史杜列治詐傷唔要得。

史雲斯領隊米高盧特立唔係善男信女，喺賽前專登翻炒呢單嘢擾敵，佢仲公開插史杜列治缺席國家隊賽事幾日，就可以「神奇傷愈」為利物浦上陣，呢位丹麥名宿仲整多一句：「都好嘅，我都想史杜列治好番正選披甲，因為我要砌低最強陣容嘅紅軍！」相當寸嘴。當然，其實利物浦有王牌蘇亞雷斯繼續停賽，右閘格連莊臣養傷，而且有3件新兵等出場，反而會破壞贏波陣容攪亂檔。
史雲斯主場硬淨對賽不敗

上屆聯賽盃冠軍史雲斯緊接要喺歐霸盃作客華倫西亞，但佢哋開季表現普通，相信會顧掂聯賽先算。仲有，史雲斯射手米捷係紅軍長期收購目標，可惜羅渣士嫌貴冇買到，賽前米捷話非常期待同利物浦較量，擺明想證明自己嘅3,000萬鎊身價唔算貴，兼且史雲斯升班後主場對紅軍有1勝1和未輸過，受讓平半有得諗！
乜都玩錦囊 紅軍冇火1.8倍細都抵玩

如果大家覺得利物浦個勢勒唔住，冷敲下盤太冒險，咁1.8倍入球細都值得留意嘅，畢竟紅軍冇咗蘇亞雷斯，開季3場聯賽都只係贏1:0，鋒力唔算太強，何況利物浦領隊羅渣士帶過史雲斯，唔會諗住大炒對手咁狠心啩，以和為貴打和開入球細唔奇喎。
Data King 利物浦連續3戰開1:0/1:0

‧史雲斯開季7戰有6仗半場保持不失。

‧利物浦只差1場，就會達到球會史上英超第400場勝仗。

‧紅軍連續3場聯賽開半場1:0、全場1:0波膽。

‧史杜列治近9次為利物浦喺正式比賽上陣入11球。