紅魔一條心合力搶Ｗ

猪拉多纳

歐聯A組首輪上演矚目大戰，英超名牌球隊曼聯主場迎戰德甲大軍利華古遜，兩隊教頭同樣首次領軍參戰歐聯分組賽，「紅魔鬼」主帥莫耶斯同射手朗尼和好，後者與尹佩斯都屬世界級攻擊球員，大軍平定內亂後，有望重上正軌。利華過去八次作客英格蘭球隊輸足六場，明顯患「恐英症」，蘇豪一於捧曼聯主勝！（有線61及201台周三凌晨2時45分直播）

曼聯教頭莫耶斯成日畀人話佢唔夠班，最大質疑就係佢欠缺歐戰經驗，今仗係佢領隊生涯首場歐聯分組賽賽事，必定想省到個招牌立立令。「紅魔鬼」季初畀人睇死唔掂，主要因為射手朗尼有離心，令人擔心球隊只靠尹佩斯一個踢晒，不過朗尼上場入咗個靚罰波，最重要係高舉雙手慶祝呢一嘢，足見佢已打消離隊念頭。若然呢位哥仔專心踢波，佢拍住尹佩斯可成全地球其中一個勁爆進攻組合，亦係球隊喺英超同歐聯爭取佳績嘅最大本錢。

「紅魔鬼」上場搞掂水晶宮後未有再添傷兵，現時主要十字軍包括右閘拉菲爾達施華及菲爾鍾斯，中場費查繼續長抖，香川真司及韋碧克一個有病一個有傷，同樣上陣成疑。莫耶斯嫡系中場費蘭尼上場後備落場表現不過不失，呢個比利時球星勁恨踢歐聯，賽前自動請纓話要落場，大軍中前場基本上齊腳，只要發揮正常水準，今場正路贏到。
利華作客英倫未威過

另一邊廂利華古遜主帥希比亞05年曾代表曼聯死敵利物浦捧走歐聯冠軍，但做教練帶隊打歐聯都係第一次，賽前希比亞話英超氣氛不及當年咁勁，但呢個「紅軍」名將重返奧脫福球場出戰，班主場球迷肯定會噓爆佢。

利華曾經八次作客英格蘭球隊，錄得兩和六負，包括兩年前造訪車路士淨吞兩蛋，反映佢哋作客英倫冇運行，今次相信都唔例外。