曼城質高頭炮柏得響

猪拉多纳

歐聯D組嘅英超豪門曼城將作客捷克球隊柏辛域陀尼亞，雖然「藍月亮」開咧表現麻麻，但之前因傷缺陣嘅隊長高柏尼有望趕及復出，加上主帥比歷連尼深明高層對歐聯寄望甚高，頭炮點都唔衰得，曼城恃質可勝柏辛域陀尼亞，客W有計。

（有線62及202台周三凌晨2時45分直播）

過去兩屆都有參與歐聯，坐擁阿古路、大衞施華、迪斯高等球星嘅曼城，卻全數喺分組賽出局，非常羞家，亦為前領隊文仙尼被炒埋下伏線。而「藍月亮」之所以睇中比歷連尼，正因佢曾帶領維拉利爾及馬拉加等中型班於歐聯創造奇迹，上屆馬拉加喺八強幾乎淘汰多蒙特，贏盡掌聲，證明佢應付歐聯確有一手。
留晒力砌柏辛域陀尼亞

上輪聯賽比歷連尼專登收起迪斯高、阿古路及捷西斯拿華斯等主力，擺明留力歐聯，同時佢亦收到好消息，曼城中堅高柏尼自英超首輪贏紐卡素受傷後，經過接近一個月休息，極有機會於今仗披甲，多番呢位隊長穩定軍心，有助鞏固傷兵滿營嘅防線。主隊柏辛域陀尼亞始終質素輸蝕，陣內多屬捷克土炮，佢哋唔單止將主力中場達列達賣畀弗賴堡，仲要倚賴38歲嘅老人家賀華夫坐鎮中場，好難頂得住「藍月亮」嘅連番衝擊，客W有1.63倍咪嫌少。