皇馬聖卡斯回歸 「大」鬧加拉地獄

猪拉多纳

歐聯分組賽激戰Kick Off！

歐聯分組賽Kick Off「聖卡斯」回歸！加拉塔沙雷今晚歐聯分組賽B組喺「地獄球場」迎戰皇家馬德里，1.5倍入球大最抵玩。首先加拉塔沙雷有史奈達倒戈，其次有杜奧巴孭飛，火力唔使懷疑。撞正皇馬後防唔單只天殘地缺，今場仲要用番雪櫃貨嘅卡斯拿斯把關，唔慌守得穩，玩入球大好路。

（有線64及203、中央5台周三凌晨2:45直播）

B組出線熱門固然係皇馬同祖雲達斯，但上屆加拉塔沙雷入到8強，對住皇馬兩回合計輸3:5唔算失禮，特別係史奈達曾經被皇馬當廢物掟走，今場再倒戈肯定搏，上屆8強次回合佢都有波入o架！至於杜奧巴就曾經喺車路士跟過安察洛堤搵食，對方點樣安排後衞嘜人，佢最清楚，好有機會踩多皇馬一腳。
加拉上屆交手唔失禮

點解咁講？因為皇馬有加里夫巴利同C朗「兩億齊飛」嘅同時，其實後防係傷兵重災區至少有4件唔踢得，呢場20人大軍衰到要安排20歲新仔卡沙度戥腳 ，沙比阿朗素又養緊傷，中場得番基迪拉比較硬淨，加上連續237日未試過為皇馬喺正式比賽上陣，只能夠喺盃賽打正選嘅卡斯拿斯雪到硬晒，對住上場聯賽又有波入嘅杜奧巴隨時出事。唔怪得《阿斯報》尋晚所做嘅民調顯示，超過30,000名受訪者入面，有60.2個巴仙嘅人都反對今場畀「聖卡斯」守龍。
皇馬後防4件唔踢得

咁當然，皇馬日前喺聯賽作客以2:2打和維拉利爾，加里夫巴利同C朗都有波入，雖然旨意佢哋合作入波可能仲要等吓，但佢兩個之間嘅競爭意識，始終會幫到皇馬入波，特別係C朗剛啱續約成為全球最高薪球員，以佢唯我獨尊嘅要面性格，肯定希望入波賀一賀，落場自不然踢得更肉緊，應該會入波畀捱眼瞓嘅各位睇。
皇馬歐聯作客必入波

兩隊對上4次歐聯交手全部開入球大。

加拉塔沙雷近14次歐洲賽主場出戰得2次輸波。

皇馬近3季18場歐聯作客全部有波入。

皇馬最近有11個球員被所屬國家隊徵召。
兩隊熟晒路捧埋半場大

上屆皇馬喺8強首回合主場贏3:0，次回合作客輸2:3，入波認真唔少，如果覺得1.5倍入球大唔夠肉食，不妨試吓玩2.15倍半場入球大。畢竟兩隊上屆踢到飛沙劈石，應該摸清晒對方後防弱點喺邊，今次再遇睇怕唔需要點熱身，完半場前入夠兩粒唔算難吖。