廣州恆大超班夠「歷」再勝

猪拉多纳

今晚亞冠盃8強次回合，會有中超豪門廣州恒大（足智彩譯：FC廣州）作客卡塔爾勁旅歷基韋亞，作為今屆冠軍大熱門嘅客軍有兩球優勢喺手，加上孔卡同穆里奇呢對超級進攻組合，要再次擊敗有多名主力傷停嘅歷基韋亞，創造歷史打入4強唔係難事，1.68倍客W絕對抵玩！

（now671台周三晚11:15直播）
歷基韋亞3主力停賽

恒大喺亞冠盃踢到依家，只係輸過1場咁大把，由16強至今夾埋更勁入12球，火力咁勁，其實全賴連FIFA都喺官網激讚嘅孔卡，同埋暫列賽事神射手嘅穆里奇呢對「南美孖寶」，一個傳、一個射，除咗進攻勁掂之外，佢哋近5戰亦都只係失過兩球，攻守兼備，難怪喺足智彩嘅奪冠賠率長居首位。

陷於劣勢嘅歷基韋亞，今場只要失1粒就起碼要入番4球先追得番，想晉級可謂難過登天，最大問題係佢哋嘅主力前鋒迪亞、防中阿度拉米同埋中堅保基拉齊齊坐波監，要頂住恒大嘅超強攻擊力實在強人所難，今場莫講話上演大逆轉，分分鐘要輸多場喇！雖然佢哋不斷搞小動作，喺恒大包機航線、下榻嘅酒店兩方面百般刁難，想玩殘呢支中超勁旅，但係咪盞激嬲恒大眾將，仲衰多二錢啦！
首回合：歷客負0:2