捧法蘭克福主場贏波

猪拉多纳

全城效應志在必勝

歐霸盃分組賽展開，F組德國法蘭克福主場迎戰法國波爾多，Alwin認為法蘭克福無論戰意同實力都勝一籌，今晚喺全場爆滿嘅羅森納主場布陣，打響頭炮機會高唱入雲，推介1.82倍主勝。

（有線64及203台周五凌晨1時直播）

法蘭克福全城對歐霸盃十分重視，皆因佢哋已經闊別歐洲戰場7年，連較早前附加賽對住弱旅卡拉巴克，門票銷售情況亦超乎理想，今晚首場分組賽更晨早出現撲飛潮，教練艾明費喺分組賽抽籤後對結果表示相當滿意，皆因三支分組賽對手法國波爾多、以色列特拉維夫馬卡比同塞浦路斯尼科西亞不但實力唔算強，而且都喺氣溫暖和而美麗嘅南歐城市，相信球迷會更享受同球隊一齊作客遠征呢啲城市嘅旅程。

法蘭克福喺德甲表現亦一仗比一仗好，上場作客3比0大炒雲達不來梅為今場增添聲勢，年輕新箭頭華拉夫卡特歷已經成為球隊新重心，今晚主場出擊信心十足。
波爾多無力兼顧歐霸

相反，歐霸盃對於好多聯賽包括意甲同法甲球隊嚟講都只係雞肋，正如今晚作客嘅波爾多，佢哋基於財困，今季流失多名主力，戰鬥力下滑，今季5場聯賽只曾一勝排緊尾5，本身兵源已經十分單薄，球會亦唔敢貪心兼顧歐霸，教練基洛治賽前講明，不足三日後嘅法甲聯賽作客對羅連安特，對佢哋嚟講更加重要，今晚會畀部分主力球員休息，球隊目前無論實力、狀態同戰意都難以同主隊相提並論。