洛查高原優勢嚇怕河床

猪拉多纳

阿甲河床聽朝喺南球盃16強首回合作客厄瓜多爾嘅洛查利加大學，後者嘅魔鬼主場位於洛哈省海拔2,060米嘅位置，外來球員比賽期間往往感到呼吸困難，仲點樣贏波吖？今場一於直取2.75倍主勝啦！

（開賽時間：周五早上8:15）

洛查利加大學雖然唔係頂級勁旅，但近年喺南球盃表現都唔太曳，上屆佢哋都係踢到16強先畀巴甲聖保羅淘汰出局，但查實當時首回合主場一樣可以踢和聖保羅，證明高原優勢唔講得笑。冇錯，洛查利加大學主帥阿古拿加賽前承認，佢哋班波無論從任何方面同河床比較，都係冇得揮，但正所謂兵不厭詐，一旦河床大意，輸住走有乜出奇？

另邊廂，河床實力可謂今非昔比，目前佢哋喺阿甲都只係排15位。教練戴亞斯雖然話已經做足功課，了解過主隊踢法，但喺高原作賽，隨時有心無力，加上防線主力艾達艾華利斯又因傷缺陣，面對住3連勝嘅主隊，相信凶多吉少。
南球盃賽制

採主客兩回合制，今輪為16強首回合。兩回合計打和，計算作客入球優惠，未分勝負將於次回合法定時間後互射12碼決勝。