撐水手主W繼續做一哥

猪拉多纳

過去一個星期妹頭繼續於工作中度過，除在電台ON AIR畀大家點唱外，周中亦有去跑馬地做馬仔直播！雖然天氣仲好熱，但現場氣氛無論係老外定本地馬迷一樣咁熱鬧。講開天氣，過咗中秋應該慢慢涼番少少，日職方面都開始分番開有早場晚場，球迷睇波就自然更加投入啦！

天氣當然對球員表現有所影響，尤其依家領頭的橫濱水手陣中有唔少老將，如大腦中村俊輔同馬昆奴斯喺涼涼地嘅天氣下踢波，自然更加醒神，佢哋嘅經驗再加上兵藤慎剛、齋藤學嘅支援，水手當然可以延續佢哋強勁嘅攻力。水手對上一次主場失利，已經要數到4月喺日聯盃輸畀松鼠仔，而今季聯賽上更加仲係保持不敗，今日應可贏清水心跳保持大佬一哥位置！
心跳後防穿大窿

至於清水心跳妹頭其實都幾鍾意，不過佢哋作客成績就好一般。最惡搞係佢哋冇咗平岡康裕，呢位後防大將整傷咗個膊頭，對心跳嚟講後防就似穿咗個大洞一樣。佢哋硬撼聯賽一哥，又點可以睇好呢？

（有線61及201台周六晚6時直播）