巴斯迎馬賽有「讓和」黃金路

猪拉多纳

啱啱打完歐聯分組賽嘅馬賽，轉個頭就要即刻應付聯賽，今晚佢哋造訪巴斯蒂亞，係，無可否認馬賽嘅人腳係比較佔優，但對手巴斯蒂亞防守查實唔差，又有以逸待勞之利，馬賽即使贏到波，比數差距應該都唔會太大，一於冷敲3.75倍「讓球和」啦！

（now714台周六晚11:00直播）
巴斯蒂亞輸波例輸1粒

馬賽喺周中雖然輸咗畀阿仙奴，但其實佢哋都有唔少入波機會，射門次數仲比「兵工廠」多成倍添，只係呢班波嘅把握力實在唔多掂，最終輸波收場，又怪得邊個吖？咁講真，馬賽前鋒阿休上仗先復出踢正選，狀態未足根本唔出奇，好彩，佢同射手基格納、翼鋒皮耶所組成嘅鋒線始終有一定質素，講到防守，佢哋今仗又有守將蘇利文尼迪亞華拉復操，今晚可候命披甲，陣容完整咗，贏波機會當然大啲啦。

但講到尾，馬賽嘅備戰時間始終較少，加上今場又要作客，想話大勝真係唔易，特別係對手巴斯蒂亞防線尚算穩陣，佢哋聯賽開季至今，只得一場比賽失多過一球，睇埋往績，原來馬賽連續4次對巴斯蒂亞都係贏1粒，有條好路，今場不妨追多鋪！