中游波踢歐聯例降班 皇蘇回晒塘唔怕反

猪拉多纳

今晚西甲皇家蘇斯達喺主場迎戰馬拉加，皇蘇季初表現平平，周中歐聯主場出擊更落筆打三更，以0:2不敵烏克蘭勁旅薩克達，鋒線又連續兩場食白果，狀態真係唔掂。對家馬拉加季前雖被拆骨，但爛船都有三斤釘，開咧至今踢落一啲都唔曳，上星期仲大派5隻光蛋畀華歷簡奴，兩軍狀態一個天一個地，當然追當頭起嘅馬拉加個2倍「讓球客勝」啦！

（開賽時間：周六晚10:00）
馬拉加西甲4戰都贏盤

皇蘇今季「升呢」踢歐聯，即係要兼顧兩邊戰線，可惜佢哋嘅板櫈深度唔夠深，以往西甲中游分子分心歐戰例必降班，到底皇蘇會唔會好似之前拉科、維拉利爾咁，真係未知之數。最大鑊係家陣開咗咧成個月，但皇蘇班主力仲好似放緊假咁，狀態衰過上季十幾倍，特別係去季射入14球嘅首席射手阿基列斯，腳風唔順之餘仲懶懶閒冇乜走位，到家陣都未開到齋，直接令鋒力打咗個七折。

對家馬拉加開季戰績尚算OK，4戰1勝1和2負，兩場敗仗分別僅負華倫同巴塞0:1，作客去到西維爾都執到1分，論表現一啲都唔失禮，上星期呢支「前富豪球隊」仲憑艾咸達奧大演帽子戲法，喺主場大勝華歷簡奴添！成班波士氣去到頂峰，開咧至今聯賽4個盤全部贏晒，今晚作客受讓，又點可以唔追多鋪呀？