多蒙特角球大啱數

猪拉多纳

歐聯輸波圍攻紐倫堡出氣

剛啱喺歐聯輸波兼輸人嘅多蒙特，谷埋一肚火，今晚返到德甲作客紐倫堡，肯定會想大炒主隊一場當發洩。火力強火嘅「蜜蜂兵團」今季客場戰往往都能夠做到圍攻對手，焗住對方死守，自然會出現較多角球，撞正今仗對手紐倫堡又係支開慣角球大球隊，今場角球大細中位數9.5球，捧1.8倍角球大冇衰！

（有線61及201、中央5台周六晚9:30直播）

喺德甲一帆風順5戰全勝嘅「蜜蜂仔」，估唔到周中歐聯分組賽展開就食一記悶棍，作客輸畀拿玻里1:2，仲要有主帥高普同門將維丹費拿相繼被逐。好彩二人今晚返德甲都可以繼續領軍同出戰，有佢兩個分別喺場邊同場內帶住班波，發揮都會有保證。當然，今仗中場線有隊長基爾同根度簡養傷，但阿美尼亞中場米希達利恩已經開始融入球隊，有佢配合前線馬高列奧斯同羅拔利雲度夫斯基，火力勁爆，今場難免又係場攻防戰。
紐倫堡只靠突擊未響勝鼓

紐倫堡呢邊，簽埋長谷部誠拍住清武弘嗣，問心講實力提升咗幾多冇人敢講，似乎想開拓更大日本市場先係真正目標。之不過，喺掛住搵錢之餘，班波執唔掂咪又係等死格局，依家佢哋開季5戰先得3和2負，仲未開到齋，但今晚撞正勁旅多蒙特，唔通會鬥攻咩？即係又係打死守靠突擊偷雞囉！

由數據去睇，「蜜蜂仔」今季客場嘅平均角球數多過主場賽事成4個有多，可能係同對手面對住佢哋都選擇死守有關，客場場均12.5個角球，自然係角球大保證。至於紐倫堡今季無論主客場場均角球都超過11個，信數據仲有乜好講？梗係捧角球大啦！