齊喝采轉倉破數據

猪拉多纳

　　執筆之時，颱風「天兔」殺到，今日有幾大影響，真係好難料，會否似上次咁雨都冇滴？抑或橫風橫雨，好似天就塌落咁。總之，場地受到太大影響，根本唔應該擺錢，太多變數在其中，何不留待風和日麗賽馬日，先同佢搏命。

　　第二場四班１６５０米泥地。「齊喝采」唔知係咪上手寶藏，落到四班已經唔使負重磅，計數賺硬，而馬匹體重上升，養得好，儲番肥，對老馬講係好事。不過，阿棟手多多，翻看此駒歷年成績，唔睇猶自可，嘩！原來四季，初出必叮。

　　但我個人幾硬頸，亦都信阿威練馬功力，希望呢匹「齊喝采」轉倉後可以打破本身初出例唔掂往績。

　　喜寶駒賽績優秀

　　第七場三班１０００米草地。住「喜寶駒」上季賽績，輸過畀「牛精好友」、贏過「美麗昇華」，已經值二班有餘，仲未計佢暑期之後有幾大進步。目前留在三班跑，對住幾匹未有成績交出ＰＰ，同埋一冇乜分在手馬，簡直係鶴立雞群，贏面九成。

　　第八場三班１４００米草地。「好靚仔」有冇機會跑打，目前言之尚早，但我對呢匹馬幾鍾意，目前在第三班必然超級，不過，１４００米未必係最佳出路，好在初出跑新鮮，兼有班次之利。

　　但記住阿棟溫馨提示，呢匹「好靚仔」今季跑得一兩場賽事之後，如果不增程，則幾難有突破。