羅馬主宰意甲首都打吡

猪拉多纳

今晚意甲焦點當然落喺首都打吡，羅馬掛名主場迎戰拉素，計往績，羅馬近3季主場都贏唔到，但此一時彼一時，佢哋今季開靚個頭，目前銳氣正盛，面對兵微將寡兼踢到殘嘅拉素穩佔上風，1.9倍主勝係Ali出擊重心。

（周日晚9時開賽）

羅馬今季流失唔少主力，換帥兼換咗大量球員，但喺新帥魯迪加西亞領導下，表現遠比預期好，開咧至今3戰全勝之餘仲僅失1球，連近季瘋狂失球嘅醜陋習都改埋，上仗佢哋作客喺半場落後一球下急起直追，結果以3比1反勝帕爾馬，優異演出獲各方大力嘉許，中場迪羅斯、史杜特文、比真歷嘅演出固然搶鏡，前線由「不老王子」托迪拍住新兵拿積攻堅，威力亦十分強勁，球隊今仗雖有中場米高巴特利、箭頭迪斯度缺陣，但仍然可以排出上輪對帕爾馬陣容出擊，有力扭轉近季主場贏唔到拉素嘅宿命。
恰拉素兵微將寡踢到殘

拉素今季開咧後3戰兩勝，唯一敗仗遇上班霸祖雲達斯就慘敗而回，球隊雖然保留咗包括高路斯等上季主力，但轉會工作做得麻麻，目前兵源相當單薄，今仗仲遇上傷停問題，兩名主力守將古斯比比亞華同史堤芬拉度、加上中場碧基亞都因傷缺陣，中場重心莫利停賽，另一守將安德里戴亞斯亦有傷上陣成疑，戰鬥力特別係防線大為削弱，加上佢哋剛於上周中踢完歐霸盃，雖然收起高路斯等部分主力，但兵源不足焗住要鴨都拉干高、靴蘭尼斯、艾華路干沙利斯同魯歷等主力搏足，耗力甚多，今場打吡戰未必回到氣。