猛火攻「城」 阿仙奴做「大」事

猪拉多纳

「兵工廠」，勢不可擋！自從領隊雲格喺轉會窗關閉前用4,250萬鎊簽入奧斯爾後，阿仙奴成班波嘅士氣當堂唔同晒，當中最大得益者，肯定非艾朗藍斯莫屬！呢位威爾斯國腳喺「大眼仔」加盟後攞到3個入波，當中有兩個仲係由奧斯爾助攻添，可見呢對中場孖寶真係勁合拍！今晚佢哋繼續領軍，喺主場迎戰鋒力唔曳嘅史篤城，一於簡簡單單捧1.62倍「入球大」啦！

阿仙奴自首戰喺主場以1:3不敵維拉後立即反彈，喺英超同歐聯加埋連贏6場未停過，法國前鋒基奧特開咧4場聯賽場場有波入，喺國家隊仲搶埋賓施馬個正選位添，足以證明「基仔」其實係一位好射手嚟o架！呢位法國國腳家陣信心爆晒棚，賽前仲豪言今季會搏命入波爭英超金靴添！
奧斯爾撻着藍斯 基奧特

查實又難怪基奧特咁大口氣嘅，事關佢有奧斯爾同艾朗藍斯幫手嘛！「大眼仔」喺對新特蘭處子登場嗰場波，就即刻交助攻畀基奧特建功，近6戰有6個「士哥」嘅艾朗藍斯又可以幫手開路，基奧特想入少粒都難啦！講開藍斯，小妹真係不得不讚呢位威爾斯國腳，只係一個夏天咋嘛，「死神」無啦啦已經升呢成為「入球機器」，阿仙奴有呢3支大炮喺度，又點會冇波入呀？

不過講到尾，小妹依然覺得「兵工廠」條防線唔多可靠，始終哥斯尼同梅迪薩卡轉身太慢，沙格拿同基蘭基比斯似翼多過似閘，今晚面對由領隊曉士執教嘅史篤城，未必可輕言穩勝喎！
史篤城近3戰不敗鋒力唔曳

始終史篤城近期個勢都好勁，繼主場以2:1砌低水晶宮、作客以1:0小勝韋斯咸後，上星期仲可以賽和曼城，尤其係前鋒堅韋尼鍾斯今季表現都幾搶鏡，相信呢位千里達射手會製造唔少麻煩畀阿仙奴，今晚兩軍都有番咁上下火力，捧「入球大」等睇入球騷就最啱啦！