札幌 長崎鬥後勁「細」均力敵

猪拉多纳

超強颱風天兔襲港，今日冇乜事幹，都係留喺屋企睇吓波，小注玩番兩手着數啲。今日中午有場日乙札幌岡薩多對長崎成功丸，畀日本傳媒稱為「playoff前哨戰」，個1.75倍入球細值得一博。

（開賽時間：周日中午12:00）

講開颱風，上星期日本都打咗場風，札幌隊波仲因為咁，喺上禮拜二滯留响東京，平白休息多一日。其實咁樣對佢哋未必係壞事，因為佢哋傷兵實在太多，尋日中場上里一將仲確認右膝前十字靭帶撕裂，需要休息8個月，加埋同一種傷患嘅深井一希未康復，後衞河合龍二又黃牌夠數坐波監，佢哋嚟嚟去去都用死幾個主力，唔攰就假，今次借打風抖一抖可能仲好。
札榥岡薩多搞「報道寫真展」

由於排第8位嘅札幌，同第4位嘅長崎只係相差8分，主場嘅札幌只要打低對手，收窄積分差距，就有機會攞到playoff資格，所以札幌好重視今場波，仲同當地新聞機構合作搞「報道寫真展」，宣傳佢哋隊波嘅光輝時刻，擺明就係要造勢贏波，平手盤本來博佢哋合理啲。之不過，札榥同長崎都係踢埋同一家波，側重長傳為主，而且都係後勁凌厲嘅球隊，前45分鐘入波唔多，所以博入球細點都好過博傷兵滿營嘅札幌。