猛將多冇默契 熱刺裝腔作「細」

猪拉多纳

熱刺今季賣走咗加里夫巴利，但補入射手蘇爾達杜、中場基斯甸艾歷臣、拉美拿等極具質素嘅球星，唔少球迷都對佢哋嘅鋒線有好大期望。不過再好嘅球員都需要時間建立默契，先產生到化學作用，今晚佢哋作客相當硬淨嘅卡迪夫城，入波應該唔會多，1.78倍「入球細」值得支持。

（now622台周日晚11:00直播）
卡迪夫城主場硬淨

英超新勢力卡迪夫城近4戰不敗之餘，近3場比賽更只係失咗1球波，狀態都幾弗吓。最恐怖係呢支威爾斯球隊喺主場出戰例踢高一班，早前仲砌低埋億萬大軍曼城，隨時令熱刺唔敢谷得太前。仲有呀，卡迪夫城賽前又傳出好消息，首席門將大衞馬素爾已經傷愈，今仗可以復出把關，防守力進一步提升，想佢哋大敗真係難過登天。

係，無可否認，熱刺中前場的確係猛將如雲，但睇番數據，查實呢支倫敦球隊聯賽場均只係入得1球，射手蘇爾達杜話就話開咗齋，但入嗰2個波都係靠12碼建功，另一個喺聯賽入過波嘅球員，就只得中場基菲爾施古臣，可以睇到呢班波仍然處於適應期。咪忘記佢哋啱啱先踢完歐霸盃，體力點都輸蝕多少，咁嘅環境，與其估邊隊開W，不如追熱刺喺英超連開5口細仲好。