國米費倫大駁火

猪拉多纳

意甲快車爆前列激戰

今晚各地聯賽續開快車，戲碼最強當數意甲前列大戰──國際米蘭主場火併費倫天拿，今季國米在新帥馬沙利帶領下，球員嘅精神面貌大為提升，上仗大炒薩斯索羅七蛋殺聲震天，加上賣盤在即，點都要交出靚績畀新老闆托希爾睇下喇，不過「紫百合」亦非善男信女，前鋒基奧斯比羅斯狀態弗爆，今仗隨時同國米駁火，阿King認為玩入球大更佳。

（周五凌晨2時45分開賽）
國米復甦迎新主

國米易主一事醞釀多時，據報印尼富豪托希爾斥資2.5億歐元收購該隊七成股份，並會在十月股東大會正式「登基」，原老闆莫拉堤會退任副會長，甚至會重召前主帥李安納度擔任體育總監添。除咗場外動作多多，國米今季表現持續復甦，新帥馬沙利為球隊注入生氣，重新激活上季死氣沉沉嘅列卡度艾華利斯，呢位阿根廷中場核心配合把握力強嘅同胞柏拉斯奧，真係如魚得水，連養傷多時嘅老將迪亞高米列圖，上仗後備入替都省兩粒，作客豪贈薩斯索羅七隻光蛋，依家成隊信心爆棚，勢必繼續騷哥利迎接新老闆入主。

不過費倫天拿呢朵「紫百合」亦唔係好蝦，雖有德國中鋒馬里奧高美斯因傷要抖兩至三個月，但基奧斯比羅斯適時爆發，呢位接近兩季冇正式比賽嘅意大利金童，開咧四場轟入四粒，睇得出佢已經擺脫兩次重傷嘅陰霾。「紫百合」上季最後一輪失落歐聯入場券勁唔抵，今季誓要捲土重來，面對競爭對手國米實搏盡冇手軟，預計今仗係鬥攻格局，大盤有1.8倍咪嫌少。
荷蘭盃要海倫芬

至於荷蘭盃海倫芬主場硬撼川迪，海倫芬今季喺主場贏過阿爾克馬爾及賽和阿積士，川迪遇強冇必勝把握，況且之前聯賽只能逼和對手，再度碰頭讓唔起海軍。最後法甲蒙彼利埃主場迎戰雷恩，前者後防甩漏多多，相反雷恩近三仗冇失波，演出漸入佳境，受讓有計。

猪拉多纳