欣賞保亞斯打吡戰撐熱刺

猪拉多纳

上星期曼市打吡成為城中熱話，講都講幾日，莫帥領軍同臨場調動再次惹人質疑，但我反而想講下朗尼。話說佢頭部受傷後，一間美國公司就主動製作咗呢件可以保護傷口嘅頭帶畀佢用，但原來呢件嘢重有個神奇副作用，朗尼戴住佢後場場入波，而且自由球愈射愈準， 我估入面可能收埋了一個準星。

其實某些球員戴上特別用具後，就如遊戲中用「寶物」後得到能力提升，好似上季費蘭度托利斯及丹巴巴亞，曾經先後受傷要戴上面具作賽，都係不停入波，相反今季除去面具後，兩人就連正選都冇埋。
想「寸王」輸波更謙虛

不過呢類「寶物」好似只係啱中前場球員，好似車路士龍門施治，亦因為曾在雷丁比賽中頭部受傷，需戴上特別頭套作賽，亦成為了他的icon。而我有份主持的球分節目，加插了星期六《球分新體驗》特別版，今集就同大家講下呢班「傷面人」，一齊玩玩遊戲熱定身，以後星期五、六晚都見到大家啦！

（now 621周六晚6時55分直播）

講咗咁多車仔球員，今個周末無理由唔睇熱刺對車仔的倫敦打吡，近來「寸王」莫連奴愈來愈謙虛，冇法啦，球隊成績咁唔穩定，我LuLu就最鍾意謙虛的人，好似保亞斯就係好例子，將熱刺教得咁好都係歸功球員，希望保亞斯報仇成功，順便令摩連奴更加謙虛啦！

（now 621周六晚7時45分直播）