愛斯賓奴「準老竇」齊發「維」

猪拉多纳

巴塞隆拿兩個老竇級「球王」昨晨發完威，唔講唔知，原來同市嘅愛斯賓奴今季都係靠兩個老竇級射手孭起隊波，講緊邊個？之唔係域陀辛捷士同沙治奧加西亞囉！佢兩個今季夾埋轟入4球，合拍程度唔差得過美斯同尼馬，今晚西甲就算造訪同樣未輸過嘅維拉利爾都冇有怕，受讓半一要1.96倍下盤。

（開賽時間：周五凌晨4:00）
維拉利爾出副選讓唔起

域陀辛捷士同沙治奧加西亞最近齊齊收到好消息，就係佢哋嘅愛妻都宣布有喜，就快又做老竇，怪唔得兩位鋒將都鬼咁Sharp，當中域陀辛捷士上仗鬥畢爾包梅開二度，隊長沙治奧加西亞仲開埋齋添，加上盛傳畀同巿死敵巴塞隆拿睇中嘅後衞赫達摩蘭奴亦已經傷愈，愛斯賓奴有前有後，今晚使乜驚你隻「黃色潛艇」先？

係，雖然話維拉利爾同愛斯賓奴一樣，開季都錄得3勝2和不敗戰績，狀態係唔錯，之不過呢支升班隊伍嘅兵源唔算係好雄厚，教練馬些連奴都話擔心扯盡班手足，所以尋日話會派3至4名副選兵擔正，對戰鬥力唔多唔少有影響，點睇都唔似會讓得起愛斯賓奴喎！