奧格斯堡掃「慕」做大騷

猪拉多纳

球迷支持「哈利」有料到

奧格斯堡喺8月底主場贏史特加，有球迷衝落場慶祝，雖然搞到球會被罰3,000歐元（約3.1萬港元），不過見到球迷咁支持自己，一班球員當然更落力比賽。佢哋今晚喺聯賽再次主場出擊，對住攻強守弱嘅慕遜加柏，合演「入球騷」冇難度，撐1.75倍入球大。

（有線61、201周六凌晨2:30直播）
慕遜加柏入波僅次多蒙特

奧格斯堡今季表現明顯比上季進步，近5仗取得4勝1負佳績。球會今夏引入前鋒哈利艾天托普應記一功，呢位重返德甲嘅射手極速融入球隊，喺前線擔大旗，改善球隊火力，佢已經連續2場主場比賽都有波入，今仗再做入球英雄唔出奇。

對手慕遜加柏今季6場聯賽一共轟入15球，入球數字僅次於多蒙特，強如拜仁同利華古遜對住佢哋都保唔到清白身，就知鋒力有幾勁。球隊除咗射手拉菲爾基達奴同中場麥斯古斯各入3球外，亦有7位隊友已經開齋，可謂防不勝防。射手拉菲爾基達賽前講明要攞3分，今仗肯定唔會縮，但以佢哋作客場均失3球嘅防線，加上中場格列沙加、守將達姆斯唔踢得，一場大手交易睇怕都走唔甩。