曼聯無氣「細」難炒西布朗

猪拉多纳

最近備受壓力嘅曼聯，喺前日嘅英格蘭聯賽盃主場以1:0氣走利物浦，領隊莫耶斯總算鬆一口氣，仲隨即發放咗張最新全家福。佢哋今晚喺主場對西布朗，射手尹佩斯料可復出，贏波問題唔大，但講到要大炒，雷法爾就有所保留，2.35倍「入球細」值得一試。

（now621台周六晚10:00直播）
提防留力歐聯作客薩克達

曼聯淘汰利物浦進身英聯盃16強止血，的確令莫耶斯壓力大減，但唔代表可以即時全面復甦。咪忘記兩個禮拜前，佢哋要留力歐聯對利華古遜，就算主場出擊兼踢多個，亦只係憑死球贏水晶宮2粒。紅魔嚟緊個禮拜要遠赴烏克蘭惡鬥薩克達，就算尹佩斯好番亦未必搏盡。事實上曼聯今季鋒力欠銳，入球板斧唔算多，好在一對後衞拉菲爾達施華、菲爾鍾斯上仗復出，令防線有更多選擇應付西布朗嘅反擊。

或者大家擔心西布朗啱啱同阿仙奴喺英聯盃激戰120分鐘，成隊波可能殘晒。但睇番佢哋上場陣容，唔少主力好似中場耶高比、守將麥奧尼、列治維等人都冇落場，擺明留力抗紅魔。呢班波對上兩季作客奧脫福球場，都係輸兩粒唔算太離譜，今晚對住領軍能力差費Sir一截嘅莫耶斯未必會大敗，入球細值得冷吼。