都靈打吡勢演入球騷

猪拉多纳

意甲早場上演都靈打吡，今季表現勇進嘅拖連奴挑戰衞冕祖雲達斯。祖記近期防線好唔集中，近4仗計晒意甲同歐聯賽事，雖然取得兩勝兩和不敗成績，但4場波都先落後再力追，後防隨時頂唔住主隊猛攻，今場Ali撐1.88倍大盤。

（周日晚6時30分開賽‧馬會網上文字直播）

拖連奴今季開咧後5戰只嘗一敗，主場未輸過，目前雖然只係排第8，但表現其實唔差，佢哋同祖記相反，經常喺比賽尾段失波，月中主場對AC米蘭，佢哋88分鐘仲領先兩粒，最終都頂唔住連失兩球痛失兩分，上輪主場鬥維羅納喺下半場領先緊2:1嘅情況下，教練雲杜拉先後收起阿歷山大法拿魯特、馬治奧尼利同首席射手阿利斯奧施斯，結果又畀人追和，近期佢哋入得又失得，阿利斯奧施斯顯示一流質素同狀態，力足威脅祖記大門。
祖記防線亂難保後方

祖雲達斯防線亂搞到連續4場波落後先，教頭干地都冇乜符，最慘佢哋正處於地獄賽程，踢完今場打吡，仲有連續4場硬仗，分別係加拉塔沙雷、AC米蘭、費倫天拿同皇家馬德里，干地賽前講明今場打吡唔會留力一樣強陣搏咗先，Ali預期今仗入波唔會少。