激情鬥志創造奇迹 布倫瑞克唔怕史特加

猪拉多纳

踢咗6場聯賽得1分，大部分人都認為布倫瑞克來季肯定會降番落德乙，不過足球場往往充滿奇迹，如果有睇過布倫瑞克最近兩場波嘅球迷，都會同阿占一樣認為呢隊波充滿激情同鬥志，今晚絕對有機會喺不擅作客嘅史特加身上搶分，主隊受讓一球，一於捧1.78倍「讓球主勝」啦！

（有線61、64、201及203周日晚11:30直播）
史特加太依賴伊比斯域

布倫瑞克自84/85球季後再戰德甲，開季4連敗後終於喺主場打和紐倫堡成功搶到第1分，查實佢哋如果有啲運，呢場波贏埋都仲得，上場作客慕遜加柏又因為球證喺關鍵時刻錯判12碼，累到布倫瑞克慘敗1:4，熱血教練利巴歷治亦被趕出場，不過隊長丹尼斯杜根話：「錯判唔係球隊嘅錯，只要繼續踢好波，布倫瑞克一定會拎到應得嘅成績。」冇怨天尤人，呢種鬥志真係一流！

史特加近3場聯賽2勝1和成績唔錯，17歲嘅迪姆華拿上輪仲成為史特加史上最年輕入球球員添，不過佢哋作客表現經常走樣，對上4次客戰輸咗3場，而且呢隊波太過依賴伊比斯域數胡，上輪聯賽呢位波斯尼亞射手完場前12碼宴客令球隊失分，信心唔多唔少會受到影響，今場作客仲要讓波，都係捧布倫瑞克「+1」「讓主」最划算。
頂占筍盤：布倫瑞克（讓球主勝）