法卡奧弗爆摩納哥開W唔「蘭」

猪拉多纳

超級豪門摩納哥今晚喺法甲作客蘭斯，呢支今夏燒錢掃入大批球星嘅勁旅意外地合拍，今場面對近況不濟嘅蘭斯，輕鬆贏波唔成問題，讓半一梗係力捧1.84倍上盤啦！

（開賽時間：周一凌晨3:00）

摩納哥今夏買入法卡奧嗰陣，唔少球迷都覺得呢位哥倫比亞前鋒只係為錢，小弟當然唔排除佢係為咗搵銀至去法甲啦，但佢喺球場上嘅表現的確證明自己物有所值喎！摩納哥開咧至今7場未輸過，其實全靠「老虎」同埋另一射手利維亞尼表現出色，合力包辦晒今季13個入球，法卡奧更係除咗賽和圖盧茲一役外，場場都有波入，保持狀態嘅話，客隊今場極有可能輕鬆大勝。
蘭斯火力弱勁食白果

反觀蘭斯雖然有主場之利，表面上亦係開季至今只輸過1場咁大把，至弊佢哋嘅火力非常弱，近4場和波之餘，更有3場「食白果」，加埋迪亞高洛迪古斯同佩格特等攻擊手缺陣，輸波之餘真係破蛋都唔使諗。