紫百合重新盛放

猪拉多纳

今晚意甲壓軸好戲費倫天拿主場硬撼帕爾馬，「紫百合」上仗領先下被國米逆轉，表現唔錯雖敗不辱，其中射手基奧斯比羅斯續有貨交，相反帕爾馬多名主力傷停難樂觀，過往作客「紫百合」又差強人意，阿King強捧1.5倍主Ｗ。

（周二凌晨2時45分開賽）

費倫天拿今季志切爭入前三取歐聯席位，雖然中鋒馬里奧高美斯因傷要抖兩至三個月，好彩仲有基奧斯比羅斯撐住，呢位經過兩次重傷嘅意大利前鋒已重拾佳態，上周中作客國米攻入其今季聯賽第五粒，腳風超順。帕爾馬上周中以4比3挫阿特蘭大，但箭頭阿馬利領紅被逐，今仗要坐波監，加埋中後場嘅加路柏及柏列達仍要養傷，搞到教頭鄧納東尼頭都痕埋，加上佢地近六次作客「紫百合」輸足五場，真係未踢已經腳仔軟，主Ｗ屬過關穩膽。
巴斯克雄獅反客為主

蘇超方面，聖美倫開咧六戰聯賽輸五場，狀態曳極，相反對手鴨巴甸連埋盃賽近五場未失過波之餘，近三場仲贏晒轟九球添，作客小讓平半兼低水擺明有計。最後西甲ＣＦ格蘭納達主場火併畢爾包，前者自首輪聯賽擊敗奧沙辛拿後已五場不勝，儘管失波少，但攻力欠銳，畀人攻破城池想追番真係難過登天，實畀畢爾包嘅主攻踢法恰死，平手盤梗係捧客軍「巴斯克雄獅」。