皇馬-2照連根拔

猪拉多纳

今晚歐聯實力最懸殊之戰，肯定係B組皇家馬德里主場對丹麥球隊哥本哈根。皇馬星光熠熠，級數高對手幾班，正好趁機盡情數胡，洗刷馬德里打吡戰落敗之痛。哥本哈根上輪被祖記狂攻，唔輸實在有運，今仗隨時要連本帶利歸還輸凸，「讓球主客和」皇馬讓兩球，度士仍睇好「讓球主勝」。

（有線62及202台周四凌晨2時45分直播）

皇馬上仗聯賽0比1輸畀馬體會，毋須太意外，畢竟馬體會近年進步神速，足以同「西超雙雄」抗衡。皇馬轉戰歐聯分組賽超晒班，教練安察洛堤更係「歐聯大師」，以往為AC米蘭兩奪冠軍，上屆帶領巴黎聖日耳門打入8強，上輪作客加拉塔沙雷「地獄球場」照炒6比1，今仗又係肥安表演時間。
「億萬雙翼」玩殘哥本哈根

除咗安察洛堤精於應付歐聯外，格食格亦有利皇馬炒哥本哈根，C朗、加里夫巴利皆以高速見稱，哥軍守將同普遍北歐球員一樣，雖然高大、硬朗，但轉身慢，遇上呢對「億萬雙翼」，恐怕只能食塵。

睇番哥本哈根上輪主場同祖記打和1比1，全場只有8次射門，連對手三分一都冇，唔輸真係有運，同埋祖記把握力差，哥本哈根今次鬥中前場人腳鼎盛嘅皇馬，難再有運行。