熱刺打爆沉淪安治

猪拉多纳

二線兵擔正搏晒命

今季成功執靚人腳「升呢」嘅英超勁旅熱刺，今晚喺歐霸盃K組出訪俄超褪色豪門安治，趁住對方今季縮皮星散，一沉不起，喺國內聯賽打11場都開唔到齋，要打落水狗有幾難？以迪科爾為首嘅一眾熱刺二線兵今仗難得擔正，落到場肯定搏命，讓波出擊都冇有怕，力奇會捧2.25倍「讓客」！

（有線61、64、201及203周五凌晨0:00直播）
熱刺人腳充裕輪住砌

熱刺今季置諸死地而後生，「癲價」賣走加里夫巴利之後，球會有大量資金增兵，買入包括蘇爾達杜、拉美拿及基斯甸艾歷臣等多位球星，整體實力不跌反升，目前喺英超踢6場取得4勝1和1負排第3，盡顯勁旅本色。球隊過往踢歐洲賽或會有所保留，不過今季佢哋人腳充裕，包括迪科爾、拉美拿、賀治比同辛度雲尼亞里等，喺英超苦無擔正機會，嚟到歐洲賽即時變出柙猛虎，上輪歐霸盃對特林素全場射門次數係14:2遠勝對手，最終亦順利以3:0大捷，進攻意欲勁到嚇死你。
安治星散俄超11戰不勝

反觀安治01年獲超級富豪克里莫夫入主，即時收購卡路士同伊度奧等世界級球星，又搵嚟希丁克呢個荷蘭名帥任教。可惜好景不常，呢位大財主今年8月因唔多滿意球隊成績，仲話成日擔心班波影響埋健康，宣布大幅裁減球隊資源，之後佢哋就將首席球星伊度奧同多位主力賣走，帥位又搵番老臣子加特捷夫回歸接任，球隊士氣低落，球員無心戀戰，難怪依家喺俄超11戰得6和5負都未開齋，排尾2飽受降班威脅，試問今晚仲邊有心機踢歐霸盃吖？

唔係講笑，安治上輪作客實力有限嘅摩爾多瓦球隊舒列夫，都只能摸和0:0。最慘係佢哋今仗仲有首席射手拉仙拿查奧爾因肩傷缺陣，連唯一火力都冇埋，想話死守咩？防線主將伊佩利安奴又因膝傷缺陣，攻守都唔齊腳，今仗睇怕凶多吉少。
熱刺開殺戒捧入球大

安治自從班主克里莫夫宣布減少投資後，前鋒伊度奧、中場狄亞拉、中堅基斯杜化森巴等多位主力被賣，實力大減。相反熱刺今季瘋狂增兵，令球隊有足夠人腳應付多線作戰，落場球員又要爭取表現，所以熱刺今屆歐霸盃特別醒神，每場至少入3球，當中射手迪科爾踢咗2場就已經入咗4球，今晚對住今非昔比嘅安治有力再開殺戒，撐1.77倍入球大。
熱刺歐霸盃全勝0失波

安治連續11場聯賽未贏過。

安治4次同英超球隊交手，取得1勝1和2負。

熱刺喺今屆歐霸盃3戰全勝，入11球失0球。
歐霸盃K組