主場王漢諾威射爆哈化

猪拉多纳

周五晚德甲獨腳戲由漢諾威喺主場迎擊哈化柏林，咪以為兩班波名氣唔大，戲碼普通，查實佢哋今季都踢出超水準，目前分列聯賽榜4、5位。特別係有地利嘅漢諾威，佢哋今季主場勁爆4戰全勝，陣內嘅「聯合國突攻隊」火力強大，即使今仗會有馬美迪奧夫缺陣，都仲有蘇拜治同侯斯迪等孭飛，唔難射爆哈化。足智彩開漢諾威讓平半，力奇捧2.05倍上盤！

（有線61、201及廣東體育周六凌晨2:30直播）
哈化3場客戰得2分

漢諾威今季靠晒主場攞分，主場4戰攞足12分，客場3戰就1分都攞唔到，所以話今晚場主場戰，使驚佢哋唔搏命？冇錯，佢哋個首席射手馬美迪奧夫因為左腳大腿肌肉撕裂，今晚唔踢得，但查實球隊今季聯賽所入10球，就分別嚟自6位成員，當中匈牙利中場侯斯迪就有3個「士哥」，波蘭新星箭頭蘇拜治都有2粒入波，加埋丹麥嘅利安安達臣、科特迪瓦嘅耶高蘭同土炮嘅艾加派比都有進帳，球隊得分點多，根本唔愁冇波入。

哈化呢邊，同樣係主強客弱球隊，今季客場3戰只得2分，今晚要喺人哋地頭全身而退，實在唔易。最慘係佢哋今場進攻隨時陷於癱瘓，事關兩大指揮官鮑祖漢係長期傷兵，近期冒起嘅突尼西亞中場賓哈迪拉又話足踝受傷，今晚未必能夠披甲。更加大鑊係，攻不銳之餘，守都唔慌穩陣，皆因巴西中堅朗尼希巴臣又係有傷在身，就算落到場都難有高水準，連後防都有漏洞，想唔輸都難啦！