杜利萊繼續數胡

猪拉多纳

　　上期講完韋達、潘頓有時未必可靠，睇見上期杜利萊出馬多夾惡，一於捧場，全日埋單2W3P，對得住馬迷有餘，點都好過韋達，全日騎9駒，係得兩駒「喜寶駒」及「榮耀假日」上名，真係輸死人。

　　杜利萊唔止上期威水，前次谷草賽事，取得兩贏兩位，捧走埋公益金盃，即係話，最近兩期贏馬打孖上。今次田戰，呢位旺人一樣子彈多，睇個勢，趁住當旺繼續數胡。

　　淨係頭兩場佢已經有機會包辦個人孖寶，「大衛精神」咁多年未試過一出就跑到入三甲，呢匹老馬上次表現令人喜出望外，睇最後幾十米走勢，跑多幾步，肯定趕過晒，再出揀田草1800米，直路長仲好追，有望擔正。

　　「開心凱旋」上場輸畀「無敵猛將」，後駒再出角逐四班賽事有Q，賽績實牙實齒，而最緊要細粒仔搏完一場，磅數冇少到，只要今場維持到，頭馬到手。

　　另外，尾兩場「陽明星星」及「勁勢」，亦係機會馬之一，近績好唔在講，又唔會冇錢分，點可以睇小。