吳定強變招打快攻 有情風用到盡

猪拉多纳

相信大家可能聽過「人嘅性格會隨住年紀而變化」，呢句說話係咪人人同意就好難講，不過套用喺練馬師吳定強身上，似乎又幾啱喎！年資較長嘅馬迷或者會記得，吳廐喺90年代練馬手法都幾急進，「長勝福星」、「本能」、「電之星」等駒都係好早就有表現嘅高班好馬。
       
有情風：跨季三戰非贏即位，表現大熟大勇。
重施昔日撒手鐧

據馬房中人所講，吳定強當時習慣以快操打磨當銳嘅質新馬，如果撞正快跳時間唔夠靚唔啱佢心水，主課嘅騎師或者助手隨時會被教訓一大餐，勢估唔到時至今日，強哥竟然搖身一變成為慢火煎魚嘅高手，而且每季成績仲有番咁上下添！之但係今季情況又唔同咗，吳定強好似想重施昔日嘅撒手鐧，旗下馬開季前又拍跳又試閘，結果三扒兩撥已經贏咗3W，睇個款攻勢仲會陸續有嚟。
       

今期田戰強哥明刀明槍，只係出得「彩利」同「有情風」一對，要捉路唔難，講到牌面，唔使問都知「有情風」最似樣啦！呢匹5歲馬上季及時取得兩捷幫強哥上岸，今季初出又跑個第三，似乎諗住賈其餘勇索性盡用，今次增程初跑一哩，隨時有機會分多幾銀，一於博佢反勝加咗分加咗磅嘅「文武精神」！