德軍新鋒線痛擊愛爾蘭

猪拉多纳

勒夫求變要技術唔要高大

世界盃外圍賽歐洲區C組尚餘最後兩輪比賽，榜首德國主場對愛爾蘭，德軍贏波即可提早出線明年巴西決賽周，今晚於科隆萊茵能量球場痛擊青黃不接嘅愛爾蘭，「讓球主客和」德國讓兩球，照捧好分頭嘅2.22倍「讓球主勝」。

（now 635周六凌晨2時45分直播）

德軍原本已經有根度簡、舒姆沙、高路斯、馬里奧高美斯同普多斯基要養傷，踢完最近一輪德甲，連馬高列奧斯、拿斯賓達同施雲賓達都要缺陣，拜仁嘅馬里奧葛斯啱啱傷愈唔會落場，咁長嘅傷兵名單，換咗任何一隊領隊都會頭痕，但勒夫實在太幸福，因為德軍仍然可以從容排出佢心目中嘅理想陣式，尤其一雙箭頭高路斯同馬里奧高美斯缺陣，佢大條道理可以試練心目中嘅新攻擊陣式，勒夫話：「我需要快速、靈活、技術出色而且全面嘅前鋒，高大中鋒已經不合時宜了。」
傑斯寧馬里奧高美斯冇運行

德國鋒線求變，無論上屆德甲神射手傑斯寧有幾大進步，狀態有幾弗，都無法得到勒夫青睞，原有球員中，老將高路斯仲可以符合勒夫條件，技術較粗糙嘅馬里奧高美斯就算傷愈都唔會受到重用，今晚勒夫將會試用湯馬士梅拿或新星麥斯古斯踢單箭頭，兩人都狀態大勇，德軍鋒力依然值得信賴。

愛爾蘭近年實力嚴重下滑，之前主場對德國都要輸1比6，近期又接連輸畀瑞典同奧地利，基本上已出線無望，領隊查柏東尼亦已離隊，現時處於無帥狀態，佢哋仍然要倚重34歲李察鄧尼同32歲嘅奧沙任雙中堅，根本無法跟得上德軍嘅速度，前線主力約拿芬禾達斯又因傷缺陣，仲要靠33歲嘅羅比堅尼單天保至尊，今晚作客德國凶多吉少。