荷蘭風流波照炒匈牙利

猪拉多纳

歐洲區D組賽事，已取得決賽周入場券嘅荷蘭主場鬥仲有機會爭次名嘅匈牙利，匈牙利已經接近三十年未試過喺國際賽贏過荷蘭，而且近九次對賽全敗之餘，勝負差距亦愈輸愈大，主場出擊嘅荷蘭依然勝算甚高，嫌主W太熱冇肉食，可改捧大盤。

（無綫翡翠台周六凌晨2時30分直播）

匈牙利最近一次擊敗荷蘭已經係1984年，之後九次對賽匈牙利全部輸晒，而且曾出現輸「1:6」、「1:7」、「3:5」等「其他」波膽，可見彼此實力早已愈拉愈遠。荷蘭已穩奪首名出線資格，但今次依然徵召尹佩斯、洛賓、史奈達等主力，態度認真，就算佢哋派謝明蘭斯、利萊費亞等副選落場，計整體實力及隊型仍然遠勝匈牙利。

匈牙利目前排第二，只以一分領先土耳其及羅馬尼亞，今場一定要搶攻，不過陣中名氣球員只有史浩克04前鋒施沙拉爾，勉強主攻隨時畀荷蘭更多機會打反擊。