FC悉尼開鑼爆噴射機

猪拉多纳

澳職今日開波喇！近年澳職邀請咗唔少較「資深」嘅球星加盟，之前有科拿，依家又有迪比亞路、希斯基及今季回歸加盟墨爾本雄心嘅基維爾等，令大家睇直播時更有親切感。其中意大利金童迪比亞路，就會喺今日場開鑼戰代表FC悉尼迎戰紐卡素噴射機！
客軍缺希斯基影響大

迪比亞路今季仲做埋隊長，佢表示球隊今季以季後賽為目標，最終梗係希望贏埋個總冠軍。FC悉尼今季決心大搞，所以季前特別飛去日本同加拿大集訓。不過熱身賽成績麻麻，仲輸過畀今日對手噴射機添！教頭法連拿話有少少失望，但畢竟熱身賽以試陣為主，都唔使咁計較賽果嘅。上季悉尼失成51球，法連拿對症下藥，簽入柏迪保積、祖文、馬斯禾倫同尼高拉柏高域等重組後防線，唔想再畀西悉尼流浪者威晒。

噴射機季初有希斯基喺季前熱身賽整親膝頭哥，今日應該出唔到。球隊今仗要搵後生仔阿當泰加特代替。佢哋今季重用干洛卓文同安祖賀利等五、六個後生仔，前途可能有，不過經驗點都輸蝕咗，加上又冇希斯基壓場，今日小妹就唔多睇好佢哋喇！呢場揭幕戰有線寬頻網上都有直播，歡迎大家邊睇邊上澳職facebook專頁同我哋傾偈吖！

（有線64台周五下午4時30分直播）