晨早出線美斯因傷退隊

猪拉多纳

阿根廷主場歎「細」界

今晚世盃外南美洲區賽事，將會有阿根廷主場鬥秘魯，主隊雖然有「球王」美斯因傷退隊，但係佢哋一早已經出線，面對無緣打入決賽周嘅秘魯，未必會派太多主力上陣，至於客軍亦唔似有心戀戰，未必開得出入球騷，都係捧2.4倍入球細啦。

（有線61及201周六早上7:00直播）
秘魯靠晒比沙路

阿根廷一早已經鎖定出線席位，加上陣中傷兵人數多達7人，難怪今次召入唔少國際賽經驗較淺嘅球員，包括首次入伍嘅國際米蘭前鋒莫路伊卡迪，同埋熱刺中場拉美拿。小妹唔敢話呢班小將質素差，但係冇咗包辦阿根廷3分之1外圍賽入球嘅美斯，希古恩亦都缺陣，加上鬥心未必十足之下，實在唔敢睇好會多波入。

客軍秘魯已經「返魂乏術」，連附加賽都肯定唔會有得踢，今場可以話當係熱身賽踢吓就算，又點會積極去爭取入球吖？更慘嘅係佢哋同阿根廷一樣傷兵累累，除咗荷西古里路之外，法芬、阿拔圖洛迪古斯、古沙度等通通列十字軍，單靠老將比沙路一人實在難望取得「士哥」，睇怕係一場累鬥累嘅悶戰喇。