奄尖大少輕磅惹飛

猪拉多纳

　　今日星期六跑馬，唔好話周某唔提醒大家，通常都係連場爆冷收科。加埋噚日睇飛，見到冇場有馬聚到飛成為一面倒大熱門之後，就更加覺得冷味濃，買開熱門嘅朋友，都係小心啲好。

　　呢鋪周某發現有四匹負輕磅嘅馬隔晚有怪飛（見表），當中頭場「日日發」同第六場「奄尖大少」嘅賠率比起上仗，真係跌咗超多，前駒報跑一場得八匹馬嘅賽事，仲可以理解，但係「奄尖大少」出爭嘅第六場，其實係滿額，仲要有「火龍寶」搶吓飛，「奄尖大少」都夠膽落咁多飛，睇嚟未必想等落五班先郁手，既然佢個W由上仗嘅82倍，落至13倍咁堅，要捧。騎師王揀杜利萊，今次得5倍雖熱，但佢熱親都有料到。(周仲)