打和格魯吉亞都掂 西班牙歎慢板博半場細

猪拉多纳

衞冕世界盃冠軍嘅西班牙，喺I組主場迎戰格魯吉亞，佢哋前線傷兵滿營，主帥迪保斯基又唔鍾意用高效中鋒尼格度打正選，面對敵方擺出鐵桶陣，往往喺初段無從入手，況且佢哋目前領先次席法國三分，今仗只需攞多一分便直入決賽周，唔會同你急，半場細不妨一試。

（now 632周三凌晨3時直播）
鍾情「無鋒」 尼格度冇癮

由於西班牙控球能力獨步天下，敵方一定出鐵桶陣，初段憑好氣好力，人人走多步進行聯防，令西班牙老鼠拉龜冇碇埋手。今次「鬥牛國」有韋拿及費蘭度托利斯因傷落選，教頭迪保斯基上仗寧願用初哥米捷打無鋒陣，都唔用近四仗入三粒嘅中鋒尼格度，睇嚟呢位曼城射手唔得迪帥歡心，今仗好大機會又先任後備。實力麻麻嘅格魯吉亞亦有自知之明，必定做好防守迎敵，睇番佢哋近七場全開半場細，硬淨到暈，加上西班牙打和亦可取得世盃入場券，隨時睇定嚟食，大家都歎慢板，半場細值得追多鋪。