猛火三獅軍 衰仔「大」翻身

猪拉多纳

世盃外終極戰 贏「波」即袋入場券

世盃外圍賽歐洲區終極戰今日爆發，香港球迷最關心嘅英格蘭喺溫布萊球場招呼波蘭，追1.62倍入球大。英格蘭贏波就肯定進軍決賽周，撞啱由朗尼率領嘅「衰仔兵團」近排大翻身，佢老人家個人近5場世盃外更喪入6球，淨係佢自己一個，分分鐘都夠開大啦！

（now621台周三凌晨3:00直播）
朗尼：心情靚咪入波囉！

現時英格蘭喺H組領先烏克蘭1分，今場贏波就乜都唔使理，可以訂機票卜間靚酒店出年去巴西。假如「三獅軍」成功出線，最大功臣一定係朗尼。呢個「衰仔」喺日前4:1打沉黑山場比賽，助攻助守兼幫國家隊打開缺口，近5場世盃外勁入6球，最勁嘅係佢近16個國際賽士哥，其實只得2球係嚟自熱身賽，含金量極高，埋單計數，朗尼喺正式比賽披甲54次攻入27球，已經超越咗奧雲，成為英格蘭史上正式國際賽入波最多嘅球員。

朗尼今季咁醒神，佢自爆係因為上季喺曼聯被費Sir屈做中場，家陣坐正做前鋒，心情靚晒，而且佢季前被紅魔球迷圍插，又畀隊友杯葛，所以當呢條「衰仔」獲莫耶斯解凍後，即時生性喪入波囉。仲有呀，以往朗尼8戰世盃決賽周仲未有士哥，比起其他隊友，可能佢先係最想拎到巴西世盃入場券嘅「三獅兵」!
爛賭二唐辛為亡兄而戰

講到英格蘭「衰仔」，當然不得不提安祖斯唐辛、史杜列治同韋碧克啦！「史、碧」兩位仁兄以往嘅敗家行徑唔多講，反而唐辛曾衰到賭波被罰停賽，就未必咁多人知，不過當佢哥哥兩年前因車禍逝世，終於令唐辛仔生性，佢仲講明今後都要為亡兄奮鬥添。

另邊廂，波蘭日前以0:1不敵烏克蘭後已無緣決賽周，不過咁，佢哋有多蒙特兩大天王羅拔利雲度夫斯基同巴拉斯塞高斯基壓陣，既然兩軍都有勁前鋒，英格蘭又有右閘基爾獲加停賽，波蘭件中堅蘇卡拉又話要坐波監，入得又失得，唔買大買乜？
三獅兵玩快攻撐埋「半主」

假如想快啲有錢收，不妨要埋英格蘭1.6倍「半主」，因為佢哋喺9場外圍賽有7次係先入波嗰隊，依家「魔童」弗到咁，再加埋個好鍾意喺上半場入波嘅利物浦前鋒史杜列治，為咗爭決賽周入場券，呢場英格蘭好可能換邊前就已經鎖定勝局！
英格蘭場均入3.2球

英格蘭主場對波蘭有4勝1和，入11球、失3球。

英格蘭今屆分組賽入29球，平均每場入3.2球。

波蘭9場分組賽得2場保持到清白之身。

波蘭歷來對英格蘭得1勝7和10負。
世盃外歐洲區H組