墨西哥求和 等踢附「加」賽

猪拉多纳

聽朝世盃外中北美洲區最後一輪，3場波將會同時間開打，其中擁有主場優勢嘅哥斯達黎加，提早出線後明顯收油，今場遇着「樂意」和波穩奪附加賽資格嘅墨西哥，雙方隨時玩龜縮鬥悶，吼實3.1倍和波啱數。

（開賽時間：周三早上9:30）
決賽周新波衫或變蟹貨

今屆演出麻麻嘅墨西哥，上輪若非前鋒魯爾占美尼斯射入世紀倒掛擊敗巴拿馬，出線機會真係凍過水。喺執番身彩之後，雖然佢哋今場砌低哥斯達黎加，同時間洪都拉斯輸波嘅話，就有機會搶埋直接出線決賽周席位，但洪都拉斯對手只係今圈未贏過嘅「魚腩」牙買加，輸波可能性確係微乎其微。

再者，假如墨西哥過分進取輸埋，巴拿馬又爆冷擊敗美國，佢哋隨時連附加賽資格都冇埋，如果係咁國家隊贊助商adidas早前推出嘅決賽周專用波衫，就即時變晒「蟹貨」，到時墨西哥前途、錢途係咁大。相信教頭路爾斯費蘭度識得權衡輕重，疊埋心水悶和鬥心成疑嘅哥斯達黎加，專心喺附加賽砌「魚腩」新西蘭攞決賽周入場券好過。
世盃外中北美洲區