上季泥地No.1 鄭俊偉強陣大反擊

猪拉多纳

近年鄭俊偉馬房嘅進步幅度可以話有目共睹，淨計上季四度成功部署同日大演帽子戲法，就已經夠晒巴閉啦！不過今季初佢手風似乎唔多順，完成咗九期賽事居然只得1W，真係令人大跌眼鏡，最慘情係亞軍竟然有9次之多，唔知佢有無打算抽啲時間，去車公廟走一趟轉轉運呢？
       
「神童」重返四班惡氣增，配合今晚鄭廐強陣可拚勝。
神童矛頭指今仗

如果米高係諗住要靠自己扭轉劣勢嘅話，今晚全泥夜戰應該係最好機會，話晒鄭廐上季泥地總共贏咗11場頭馬，成績冠絕24廐；睇番佢馬房今晚陣容，餐士最大應該要數到第三場隻「神童」。呢匹馬上季兩次贏馬都撞正馬房搞大project連中三元，擺明喺練者心目中係屬於信得過嗰批。「神童」今季跑過兩仗，由初出孭住個肚腩到依家收晒身，狀態已經有明顯進展，呢鋪及時減夠分落班，即刻搵番最合拍嘅杜利萊執韁，擺明都係搏命格，確實值得高度重視。
       

同晚上陣嘅「皇仁勁駒」，幕後同「神童」息息相關，根本分屬半同主關係。隻馬上季亦係大熟大勇，轉倉以來唔經唔覺已經取得3捷，上場草地跑第二輸畀「醒目波幅」，雖敗猶榮，今勻配安國倫跑首本戲，亦係米高主要爭分籌碼。