波衫印錯名家常便飯

猪拉多纳

現今球衣又型又靚，其實於功能上都好重要，當然包括方便識別球隊同球員。但試想吓，你嘅波衫顏色鬼五馬六，仲要連名都印錯，穿上身令你自信受損，你喺場上嘅表現又點會好？所以一支球隊成績好定壞除咗關球員同領隊事，背後同樣肩負起成支球隊嘅榮與辱，仲有「球衣管理員」。

叫得做球衣管理員，日常最重要嘅工作梗係要管理印好晒球員名字同號碼喺比賽球衣啦！睇落份工好似幾簡單，但一個唔留神，就好容易有蝦碌嘢出現o架啦。好似前英超球隊布力般流浪個球衣管理員就認真大意，曾經將賓尼個名「BENTLEY」燙咗做「BETNLEY」，另一位布力般球員辛達告魯斯件波衫又由「SANTA」 CRUZ變咗「SATNA」 CRUZ。

原來出錯嘅唔只得細球會，連曼聯嘅球衣管理員都成日出錯o架喎，例如路爾斯安達臣、古斯錫、蘇斯克查，甚至係「萬人迷」碧咸件衫都試過燙錯咗個名o架，睇嚟曼聯嘅球衣管理員阿頭Albert Morgan真係要好好督促住班員工喇，星期五《球分》節目入面再同大家數一數！

（now 101周五晚10時30分直播）
周六修咸頓難敵紅魔

講開紅魔，佢哋今個星期六就會主場對修咸頓。要對住狀態大勇嘅曼聯前鋒朗尼同紅魔防線，修咸頓球員或者可以考慮一下印錯自己個名，令曼聯守衞因為睇錯名而不能集中，從而趁機射門入波，否則修咸頓都好難贏到曼聯囉。

（now 621、630周六晚10時直播）

另外仲有第二階段大抽獎，由10月18日至11月22日期間玩《球分》，累積滿1,800分即可參加超級大抽獎，有機會獲得雙人4日2夜英超自遊行套票去睇車路士對曼聯o架，快啲參加啦！