羅馬大戰拿玻里

猪拉多纳

闊別一季 電視重現

闊別一季，香港球迷終於有得睇意甲直播！頭炮即上演榜首大戰，羅馬主場對拿玻里。羅馬由「心理導師」魯迪加西亞執教下，猶如被催眠，眼中得一個贏字，開季7戰全勝，銳不可當。球隊冇歐洲賽後顧，專注聯賽爭標，每場都可搏盡。拿玻里喺「戰術大帥」賓尼迪斯領軍下，演出不遑多讓，鋒線組合多元化，輪流發威，掃射對手。兩支攻力最強球隊交鋒，戰況變數多，建議要入球大。

（TVB 13及now 818周六凌晨2時45分直播）

相信開鑼前，冇人預計到羅馬可締造完美戰績，對新帥魯迪加西亞亦好陌生。呢位49歲法國籍主帥擅長心理輔導，激發球員潛能，助佢哋發光發熱，最成功例子裁培出夏薩特，率領中型班里爾奪得10/11年球季法甲冠軍。羅馬近年淪為意甲二線球隊，情況同魯迪加西亞初教里爾相似，佢嘅「心理導師」本領再次大派用場，將唔識入波嘅兵工廠棄將謝雲奴激活搵番射門鞋，又幫防中費奧倫斯轉型為翼鋒，呢位22歲小將依家仲做埋球隊首席射手，周中更為意大利國家隊入波，唔到你唔服。
「心理導師」激活羅馬

羅馬除王子托迪外，球星唔多，但喺魯迪加西亞精心調教下，個個都係猛將，聯賽7戰入20球，只失1球，就係最好說明。魯迪加西亞亦係一位崇尚進攻嘅教練，上仗作客國際米蘭，上半場已攻入3球，今仗有地利，更加放膽出擊。

拿玻里失去射手卡雲尼，反而令賓尼迪斯有更多空間打造進攻組合，彭迪夫、荷西卡利祖、恩斯治尼、咸錫都唔係正宗前鋒，但勝在走位靈活，令攻勢更多元化，上仗即使缺少希古恩，照炒利禾奴4蛋。今場波提早於當地時間周五舉行，令拿玻里有更多時間休息，備戰下周中歐聯對馬賽，毋須太擔心後顧，一於同羅馬火併，力爭搶走榜首位置。