中岸水手慢熱旺半場和

猪拉多纳

澳職今季其中一個焦點，就係前國腳基維爾回歸。恕小妹睇波日子淺，真係未睇過呢位仁兄踢列斯聯同利物浦時嘅威猛樣，一睇就已經係佢前季踢墨爾本勝利喇，但佢表現認真麻麻，好在外形不俗，屬於愈老愈型嗰類，咁都可以戥番勻吓嘅。

基維爾今季回歸澳職唔係返墨爾本勝利，而係去咗同市另一球隊雄心。雖然佢係一代球星，但歲月催人，小妹唔信佢改善到雄心嘅進攻。佢之前重拉親條頸，今日對中岸水手呢場上陣機會只係一半半，未必會落場o架。
雄心貴自知 鍾意守住先

由於雄心整體實力亦唔算好，所以教頭艾萊斯上場開季戰對勝利嘅打吡，都係採取穩守突擊，先做好防守，結果如願悶和對手。「雄心」今日應踢「4-4-1-1」陣式，艾萊斯自己知自己事，既然隊波技不如人，就希望實際啲守住先，再搏摸和多一場。

中岸水手實力雄厚，佢哋近９次對雄心贏足７次，可謂雄心剋星，熟悉水手嘅球迷都知佢哋勁得嚟比較慢熱，鍾意上半場控制形勢先，下半場先嚟料，上季開半場和次數高達14次可證明呢點，所以小妹今場都會支持雙方「和氣半場」先囉！　　　　　　　

（有線64台周六下午2時30分直播）