紅魔聖人「大」作戰

猪拉多纳

中游 Vs 前列新版本

紅魔、聖人鬥攻做大騷！曼聯喺今季英超創下24年嚟最差開局，今晚呢支「中游分子」喺聯賽主場鬥前列嘅修咸頓，對兩軍嚟講都係關鍵一戰。如果紅魔經過國際賽期後又再失分，隨時令士氣受挫翻唔到身；而成功殺入前列嘅修咸頓，當然希望借勢喺曼聯身上搶分鞏固位置，兩軍「大」激戰可期，當然捧1.72倍入球大啦！

（now621及630台周六晚10:00直播）
曼聯近6戰得1場不失

季前又有邊個諗到，經過7輪英超之後，曼聯會變成「中游分子」、修咸頓就躋身前列先？英國《每日鏡報》更以「中游球隊能否抵擋爭標分子」為題去講呢場波，就知紅魔依家有幾o架！

老實講，小妹真係唔覺得曼聯有十足把握贏今場波，佢哋近5場聯賽輸咗3場都算，最大問題係尼曼查維迪同埋有傷未必出得嘅里奧費迪南都頻頻犯低級錯誤，搞到近6戰只得1場冇失波，今場仲要對住火力強勁嘅修咸頓，就算朗尼、韋碧克同尹佩斯3大射手喺國際賽重拾佳態，都未必幫補到後防失波啦！
修咸頓正選門將有傷

修咸頓今仗對住攻強守弱嘅曼聯，有正選門將保路錫有傷未必可以把關，要延續連續5場唔失波嘅走勢有難度，但佢哋今夏買入唔少高質球員，近排似乎愈夾愈好，奧斯華度已經「開齋」，拉爾拉拿亦愈踢愈掂，老將列基林拔每場亦為對手帶嚟極大威脅，呢班攻擊手合力嘅話，實在唔係防線差嘅曼聯可以抵擋，鬥攻嘅話，當然最利開大喇！
Data King 修咸頓9戰僅1敗

‧修咸頓喺今季各項賽事9戰僅得1敗。

‧曼聯今季7戰失9球，防守暫列英超第5差。

‧修咸頓7戰聯賽僅失2球，防守暫列英超最佳。
乜都玩錦囊 紅魔易出事撐聖人「讓客」

雖然唔可以單憑排名去估勝負，但曼聯防守差係不爭事實，而且佢哋喺國際賽期間要服兵役嘅球員比修咸頓多，兵疲將乏今仗隨時又「出事」。「聖人」要保住不失係唔易，不過佢哋防守始終有番咁上下，只要咬得入紅魔，最尾真係未必會全失3分，受讓1球不妨冷敲2.55倍「讓客」啦！